5 ЈАДЕЊА ОД КОМПИР НА КОИ НИКОЈ НЕ МОЖЕ ДА ИМ ОДОЛЕЕ: Имаат феноменален вкус, ќе ги направите за кратко време

Компирите се една од најомилените намирници на сите нас, па затоа се незаменлив дел од трпезата и речиси секојдневно ги имаме на менито. Има безброј начини на кои можете да го подготвите, а ние за вас одбравме пет од најубавите!

Гратин компири со кисела павлака

Состојки: 2 килограми компири, 400 грама павлака, 1/2 литар млеко, 1/4 лажичка коријандер, 2 чешниња лук, 50 грама путер, сол, бибер, рузмарин, мајчина душица, сирење.

Подготовка: Загрејте го млекото и додадете коријандер, бибер, ситно сечкан лук, рузмарин, мајчина душица и малку сол. Штом млекото ќе почне да врие, тргнете го од оган, покријте го и оставете го да се излади. За тоа време излупете ги компирите, измијте ги и исечете ги на прстени (како за мусака) и исушете ги во кујнска крпа. Процедете го млекото и прелијте го врз подготвените компири и оставете покриено околу 45 минути. Протресете или мешајте повремено. Изматете ја павлаката со бибер и сол.

Компирите процедете ги. На дното на огноотпорен сад премачкан со путер наредете слој од компири, па премачкајте со павлаката и лесно прелијте го млекото во кое беа натопени компирите. Така се редат додека не се потрошат состојките. Завршете со дебел слој павлака. Покријте го садот или покријте го со алуминиумска фолија и печете во рерна загреана на 200 степени околу еден час. После тоа, расклопете и печете уште половина час додека површината не порумени. Кон крајот по желба посипете со рендано сирење.

Послужете топло со салата по избор.

Француски компири

Состојки: 1 килограм компир, 1 главица кромид, 4 варени јајца, 1 сурово јајце, сланина, 1 чаша павлака, сол, бибер, босилек.

Подготовка: Во еден сад сварете компири во кора, а во друг јајца. Кога ќе бидат готови, излупете ги и исечете ги на прстени. Сланината и кромидот исечкајте ги на помали парчиња. На дното на садот за печење ставете малку масло и наредете ги состојките – кромид, компири, јајца, сланина и така додека не ги потрошите. На крај, покријте ги компирите со мешавина од изматено јајце и павлака. Печете на 200 °C додека компирите не добијат крцкава кора.

Крокети од компири

Состојки: 700 грама компири, 150 грама брашно, 40 грама мек маргарин, 1 лажица билни зачини, 2 жолчки. Фил: 100 грама сирење.

Смесата за печење: 2 јајца, 200 грама брашно, 200 грама презла.

Подготовка: Сварете ги компирите, заедно со кората. Сварените компири изладете ги, излупете ги и испасирајте ги (како за пире). Во пирето додадете една лажица зачини, брашно, омекнат маргарин и две жолчки. Замесете тесто. Доколку е потребно, додадете уште брашно. Тестото по малку ќе се залепи за вашите раце, така што секогаш имате брашно при рака. Сирењето исечкајте го на тенки стапчиња. Земете го тестото со лажица (кое треба да се натопи во масло пред секоја употреба) и ставете го на набрашнета рака. Намачкајте го малку и врз него ставете стапче сирење. Формирајте крокети со помош на брашно.

За панирање: Во една чинија изматете јајца, во друга ставете брашно, а во третата ставете презла. Крокетите (кога сите ќе се формираат) валкајте ги прво во брашно, па во јајца и на крај во презла. Пржете ги во длабоко масло, на средна температура. Кога пржените крокети ќе поруменат, извадете ги на кујнска хартија за хартијата да го впие вишокот маснотии. Послужете топло, со прилог по ваш избор. Особено добро одат, како прилог, со пилешко.

Гноки во сос од домати

Состојки: 1 килограм компир, 200 грама брашно, 1 јајце. За сос од домати: 1 килограм домати, доволно маслиново масло, 1 чешне лук, неколку листови босилек, сол.

Подготовка: Сварете ги компирите со лушпите во зовриена вода додека целосно да омекнат, околу 40 минути. Додека се варат компирите, подгответе го сосот така што ќе ги исечете доматите на половина, ќе го загреете маслиновото масло и ќе пропржете сечкано чешне лук, па додадете ги доматите. Посолете и варете десет минути. Доматите ќе ги испуштат своите сокови, а на крајот од готвењето додадете свеж босилек, кој ќе додаде вкус и свежина на сосот.

Варените компири оставете ги малку да се изладат, а потоа излупете ги (уште топли) и ставете ги во блендер за да направите пире. Во пирето се додава 1 јајце и 200 грама брашно, па се замесува тестото да не се распадне премногу. Додадете уште брашно доколку е потребно, но не претерувајте за тестото да не биде премногу меко. Направете ги њоките на парчиња од 1 сантиметар и притиснете ги со вилушка за да им дадете класичен облик на ребро. Потопете ги њоките во зовриена солена вода, а потоа извадете ги кога ќе испливаат на површината. Добро исцедете ги од вишокот вода и додајте ги директно во сосот од домати.

Грчки компири

Состојки: компири по желба, маслиново масло или стопен путер, сирење, сок од еден лимон, половина лук, сол, бибер, оригано и масло или маргарин за подмачкување.

Подготовка: Компирите исчистете ги и исечете ги на четвртинки по должина. Наредете ги компирите во тавче подмачкано со масло или маргарин. Во посебен сад измешајте: маслиново масло или стопен путер, сок од лимон, исцедете малку лук за да се ослободи сокот (не го ставате целото чешне и ова е по желба), сол, бибер, оригано и вода. Добро измешајте и прелијте ги компирите. Целата смеса треба да ја наполни тавата до половина од компирот. Загрејте ја рерната на 210 до 220 степени. Покријте ја тавата со алуминиумска фолија и ставете ја во рерна. Печете околу 40 минути со фолија и уште 20-30 минути без фолија. Доколку забележите дека водата истекува, слободно додадете уште. На крајот додадете го кашкавалот (само убаво изрендајте го) и промешајте за се убаво да се соедини.