СОЈУЗНА ДРЖАВА ВО АМЕРИКА ЗАБРАНИ ПРОМЕНА НА ПОЛ КАЈ МАЛОЛЕТНИЦИ

Гувернерот на сојузната држава Ајова, републиканката Ким Рејнолдс во средата потпиша закон за забрана на т.н родово-афирмирање на малолетници, приклучувајќи се кон големиот број „црвени држави“ кои го забранија пристапот до третмани за транс-млади во Америка, објави CNN.

Со забраната не смее да се применува никаков третман, социолошки, психолошки, бихевиорален ниту пак медицински интервенции за родово афирмирање на малолетници чиј „родов идентитет“ не се совпаѓа со биолошкиот пол. Односно со други зборови се забранува каков било третман за родова транзиција кај малолетни лица.

SF 538 им забранува на здравствените работници да даваат медицински третман „со цел да се обидат да го променат изгледот или да ја потврдат перцепцијата на малолетникот за родот или полот на малолетникот, доколку тој изглед или перцепција не е во согласност со полот на малолетникот (при раѓањето). Законот стапи на сила веднаш по потпишувањето, се додава во текстот на CNN.

Здравствените работници за кои ќе се утврди дека го прекршуваат законот ќе подлежат на дисциплина од соодветниот одбор за лиценцирање и може да се соочат со тужби.

Предлагачот на законот, републиканскиот државен пратеник Стивен Холт, за време на дебатата на почетокот на месецов рече дека законот има за цел да го запре третманот што тој го сметаше за премногу „експериментален“ за да биде дозволен, пишува CNN.

„Верувам дека медицинската ефикасност на овие третмани не е докажана“, рече Холт.

Во средата, Рејнолдс потпиша закон кој опозицијата го нарекува „закон за тоалет“, со кој „им се забранува на трансродовите лица да користат училишни тоалети што не одговараат на нивниот биолошки пол“, стои во извештајот на CNN, а за ова пишува и Асошиејтед прес.

Вчера, Светската атлетска федерација забрани трансродовите жени да се натпреваруваат во женска конкуренција на меѓународните настапи.

И додека во светот секојдневно се зголемува отпорот против „родовата идеологија“, кај нас се прават обиди таа да заживее, без да се земат предвид меѓународните искуства.