ВАГНЕР ТРГНА ВО НАПАД НА МОСКВА

Шефот на платеничката група „Вагнер“ Евгениј Пригожин најави дека неговите борци ја преминале границата на Украина кон Русија и дека „ќе одат до крај“ против руското воено раководство.

„Ние сме 25.000 и ќе дознаеме зошто се случува хаос во земјата“, изјави претходно Пригожин во серијата гласовни пораки на Телеграм, но додаде дека неговиот повик за акција против руската армија не е воен удар, туку „марш за правда“.

„Борците и јас ќе го уништиме секој што ќе ни застане на патот“, рече Пригожин, додавајќи дека тие влегле во јужниот руски град Ростов.

Во Ростов на Дон, град на југот на Русија, блокирани се улиците во центарот на градот. Локалните медиуми РостовГазета пренесуваат дека очевидци изјавиле дека сообраќајот е затворен на авенијата Буденовски, каде што се наоѓа седиштето на Јужниот воен округ. Во близина има оклопни транспортери и друга воена опрема, а штабот е опколен со кордон. На дописникот на РостовГазета му е забрането да фотографира, нема мобилен интернет во близина на седиштето. Медиумите претходно објавија дека се блокирани северниот и западниот влез во градот, а на автопатот се формирале колони.

Воениот персонал на Ростов добил наредба да подигне воени авиони за да „обезбедат безбедност“, објави 161.ru, повикувајќи се на неименуван извор. Тие, исто така, велат дека претходно Јужниот воен округ побарал да се забранат сите масовни настани на отворено во Ростов. Главната администрација на руското Министерство за вонредни состојби за Ростовската област соопшти дека не испратила информации за воведување полициски час во регионот, но гувернерот Васил Голубев ги повика граѓаните да останат дома ако е можно.

Во Москва се зајакнати мерките за безбедност, јави агенцијата ТАСС, пред се околу најважните владини локации и инфраструктура во главниот град.