Во Сочи денеска почнаа разговорите меѓу рускиот и белорускиот претседател Владимир Путин и Александар Лукашенко.

Лукашенко одлета за Русија ден претходно.

Како што информираат од белоруската страна, главни теми на состанокот се меѓународната агенда и регионалните прашања, како и заедничките задачи во економијата – во индустријата, земјоделството и другите сектори и севкупно големата работа на полето на замена на увозот.

Белорускиот претседател Александар Лукашенко за време на средбата предложил да се реализира трилатералната соработка меѓу неговата земја, Русија и Северна Кореја, јави Белта.

„Внимателно ги следев вашите последни работни денови со настани. Беше убаво да се види вашата средба со Ким Јонг Ун. Мислам дека можеме да размислуваме за тоа, трилатерална соработка. Северна Кореја, Русија… Знам дека Корејците имаат голем интерес за соработка со Русија. Мислам дека ќе има работа за Белорусија. Имајќи ги предвид проблемите што постојат“, му рече белорускиот лидер на Владимир Путин.

300.000 доброволци за војната во Украина

Соединетите Американски Држави користат касетна муниција во рацете на украинската армија во полн капацитет, иако самите тоа го нарекуваат злосторство, изјави рускиот претседател Владимир Путин на средбата со претседателот на Белорусија Александар Лукашенко во Сочи.

„Вашингтон верува дека тоа е кривично дело, но си дава право да го стори тоа. Токму тоа е главниот проблем на меѓународните односи. Затоа огромното мнозинство земји ни се придружуваат во борбата за создавање мултиполарен свет“, објаснува претседателот.

Ситуацијата наметната од САД не му одговара речиси на никого, дури ни на сојузниците на Вашингтон, кои тој ги третира како подредени, наведува тој.

Веќе 300.000 доброволци се пријавиле за учество во Специјалната воена операција (СВО), додава Путин и посочува дека овие храбри луѓе се подготвени да ги жртвуваат своите животи во интерес на својата татковина, штитејќи ги интересите на Русија.